Кондак 1
И́збраннии страстоте́рпцы Христо́вы четыредеся́те, во гра́де Севасти́йстем чрез огнь и во́ду проше́дшии и в поко́й ве́чный вше́дшии, пе́сньми восхваля́ем вас, засту́пников на́ших. Вы же, я́ко иму́щии ве́лие дерзнове́ние ко Го́споду, от вся́ких нас бед свободи́те, любо́вию вам зову́щих:
Ра́дуйтеся, святи́и четыредеся́те му́ченицы Севасти́йстии, пресла́внии чудотво́рцы.
Икос 1
А́нгели Бо́жии, храни́телие ро́да челове́ческаго, зря́ще пред мучи́телем дерзнове́нное ва́ше испове́дание Христа́, на по́двиг страда́льческий неви́димо вас укрепля́ху. Мы же, ве́дуще вас, по́двиг се́й до́бре соверши́вших, ра́достно взыва́ем:
Ра́дуйтеся, дерзнове́нным испове́данием Христа́ возвесели́вшии А́нгелы;
Ра́дуйтеся, ди́вным терпе́нием ва́шим мучи́телей удиви́вшии.
Ра́дуйтеся, страда́нии ва́шими диа́вола посрами́вшии;
Ра́дуйтеся, непобеди́мою си́лою Христо́вою про́тиву неви́димаго врага́ вооружи́вшиися и вся злохи́трыя того́ на вы ко́зни победи́вшии.
Ра́дуйтеся, неисче́тнаго му́ченическаго ли́ка украше́ние;
Ра́дуйтеся, земны́я вои́нствующия Це́ркви си́льнии помо́щницы.
Ра́дуйтеся, святи́и четыредеся́те му́ченицы Севасти́йстии, пресла́внии чудотво́рцы.
Кондак 2
Ви́дя зверонра́вный мучи́тель ве́ру му́чеников, заключи́ их в темни́цу;
Госпо́дь же благоутро́бный я́ве посети́ Своя́ рабы́, похваля́я нача́ток по́двига их и увещева́я неосла́бно о́ный соверши́ти, яко то́кмо претерпе́вый до конца́ венча́ется в Ца́рствии Небе́сном и сподобля́ется со А́нгелы пети: Аллилу́иа.
Икос 2
Ра́зум Боже́ственный от я́вльшагося вам Христа́ приемше́, утверди́стеся в страда́льческом по́двизе, святи́и страстоте́рпцы, и укори́зну Агрикола́я мучи́теля в похвалу́ себе́ вмени́сте. Сего́ ра́ди вам вопие́м:
Ра́дуйтеся, ра́зум пра́вый богове́дения стяжа́вшии и во́лю свою́ во́ле Бо́жией всеце́ло преда́вшии;
Ра́дуйтеся, вся пре́лести мирския́ и сла́ву во́инскую ра́ди Христа́ ни во что́же вмени́вшии.
Ра́дуйтеся, ласка́ний мучи́теля не послу́шавшии и гро́зных того́ преще́ний не убоя́вшиися;
Ра́дуйтеся, те́мничное заключе́ние ра́ди Христа́ претерпе́вшии.
Ра́дуйтеся, Спаси́телем ми́ра во у́зах посеще́ннии, благи́ми словесы́ от Него́ уте́шеннии и на по́двиг укрепле́ннии;
Ра́дуйтеся, я́ко с ве́рою вас почита́ющих в ско́рбех утеша́ете и от бед избавля́ете.
Ра́дуйтеся, святи́и четыредеся́те му́ченицы Севасти́йстии, пресла́внии чудотво́рцы.
Кондак 3
Си́ла Вы́шняго соде́ла вас, страстоте́рпцы святи́и, си́льных в сло́ве пред нечести́выми, те́мже не терпя́ дерзнове́ния ва́шего, го́рдый мучи́тель па́ки в темни́цу вас вве́рже, в ню́же ра́достно теко́сте, пою́ще Бо́гу: Аллилу́иа.
Икос 3
Иму́ще, страстоте́рпцы, в темни́це сострада́льца ва́шего Кирио́на бла́га себе́ учи́теля, укрепля́стеся в ве́ре Христо́вой и, по днех осми́х ведени́ бы́вше на суди́ще, безбоя́зненно предстае́те Ли́сию кня́зю и Агрикола́ю воево́де, му́дре обличи́сте их нече́стие. За таково́е ва́ше дерзнове́ние приноси́м вам сицевы́я хвалы́:
Ра́дуйтеся, в броню́ ве́ры Христо́вы облече́ннии и щито́м благода́ти Его́ покрове́ннии;
Ра́дуйтеся, еди́наго Христа́ па́че всех возлюби́вший и ра́ди Его́ повеле́ния беззако́нная мучи́телей презре́вшии.
Ра́дуйтеся, си́лу Христо́ву пред нечести́выми пропове́давшии и всемогу́щество Бо́жие я́ве показа́вшии;
Ра́дуйтеся, я́ко и ка́менная мета́ния вам не прикаса́хуся.
Ра́дуйтеся, я́ко та си́лою Бо́жиею на мета́ющих я возвраща́хуся;
Ра́дуйтеся, я́ко и ны́не моли́твами ва́шими к Бо́гу вра́жия стре́лы от нас отража́ете.
Ра́дуйтеся, святи́и четыредеся́те му́ченицы Севасти́йстии, пресла́внии чудотво́рцы.
Кондак 4
Бу́рею зло́бы про́тиву Христа́ дыша́, го́рдый Ли́сий трети́цею вве́рже страда́льцев в темни́цу, в не́йже па́ки Христо́с яви́ся, ободря́я, утеша́я их и нетле́нныя венцы́ в Ца́рствии Небе́сном обеща́вая, они́ же сия́ слы́шавше, ра́достно поя́ху Бо́гу: Аллилу́иа.
Икос 4
Слы́шавше мучи́телие тве́рдое страстоте́рпцев Христа́ испове́дание, осуди́ша я на всено́щное в хла́днем е́зере стоя́ние, они же огнь любве́ Боже́ственныя в сердца́х иму́ще, не убоя́хуся лю́таго мра́за, но единоду́шно сла́вяще Бо́га, идо́ша на страда́ние. Мы же, терпе́нию сих чудя́щеся, зове́м си́це:
Ра́дуйтеся, добропобе́днии Христо́вы испове́дницы;
Ра́дуйтеся, кумирослуже́ния низложи́телие.
Ра́дуйтеся, терпе́нием лю́таго муче́ния в поко́й ве́чный вше́дшии;
Ра́дуйтеся, боле́зньми страда́ний обре́тшии неизрече́нныя блага́.
Ра́дуйтеся, драгие́ и кре́пцыи четыредеся́те ка́мение;
Ра́дуйтеся, Це́рковь Христо́ву собо́ю укрепля́ющии и осиява́ющии.
Ра́дуйтеся, святи́и четыредеся́те му́ченицы Севасти́йстии, пресла́внии чудотво́рцы.
Кондак 5
Боготе́чнии зве́зды Христо́вы яви́стеся, святи́и, в но́щнем хла́де во е́зере Севасти́йстем сия́ющии, и́хже не прельсти́ те́плая ба́ня собла́зна, но со А́нгелы Бо́гу поя́ху: Аллилу́иа.
Икос 5
Ви́девше святи́и, я́ко еди́н от них отпаде́, убоя́вся бо мра́за но́щнаго, и скры́ся в те́плой ба́не и а́бие умре́, те́пле взыва́ху ко Го́споду, да их укрепи́т в по́двизе страда́ния и просла́вит и́мя Свое́. Мы же зове́м вам си́це:
Ра́дуйтеся, сла́внии победоно́сцы, вся ко́зни сопроти́вных победи́вшии;
Ра́дуйтеся, всю нощь нази́ ю е́зере стоя́вшии.
Ра́дуйтеся, единоду́шно та́мо Го́спода призыва́вшии;
Ра́дуйтеся, я́ко в терпе́нии ва́шем по́мощь ско́рую Госпо́дь низпосла́ вам.
Ра́дуйтеся, я́ко свет Боже́ственный с небесе́ осия́ вас;
Ра́дуйтеся, венцы́ пресве́тлии с небесе́ прия́вшии.
Ра́дуйтеся, святи́и четыредеся́те му́ченицы Севасти́йстии, пресла́внии чудотво́рцы.
Кондак 6
Пропове́дницы ди́внаго чудесе́, стра́жие, в ба́ни бы́вшии, пове́даша, ка́ко в нощи́ свет небе́сный во е́зере облиста́ му́ченики, лед растопи́ и хлад в теплоту́ преложи́, е́же слы́шавше, мучи́телие па́че зло́бою распаля́хуся, не ве́дуще пе́ти Бо́гу: Аллилу́иа.
Икос 6
Возсия́вшу во е́зере све́ту небе́сному, возсия́ и в се́рдце еди́наго от стра́жей благода́ть Бо́жия, я́ко той совле́кше ри́зы своя́, вве́ржеся во е́зеро ко святы́м му́чеником, восполня́я ме́сто отпа́дшаго, и та́ко посрами́ся князь тьмы, ликова́вый о умале́нии ли́ка страда́льцев, и́мже мы ны́не вопие́м такова́я:
Ра́дуйтеся, Христо́вы страстоте́рпцы, моли́твами и терпе́нием ва́шими весе́лие диа́вола в печа́ль обрати́вшии;
Ра́дуйтеся, от зло́бы и кова́рства его́ ве́рныя избавля́ющии.
Ра́дуйтеся, в хла́де воды́ благода́тию Свята́го Ду́ха просвети́вшиися;
Ра́дуйтеся, стоя́нием ва́шим во е́зере мы́сленнаго зми́я главу́ сокруши́вшии.
Ра́дуйтеся, по́лная четыредеся́тнице, Христу́ бо́дренно предста́вшая;
Ра́дуйтеся, ве́рою, терпе́нием и страда́нием Христа́ ра́ди блаже́нство ра́йское унасле́довавшии.
Ра́дуйтеся, святи́и четыредеся́те му́ченицы Севасти́йстии, пресла́внии чудотво́рцы.
Кондак 7
Хотя́ще чу́днии страда́льцы ве́ру во Христа́ непоро́чно сохрани́ти, сла́ву во́инскую и ласка́ния мучи́телей ни во что же вмени́сте, и вся лю́тая муче́ния, а́ки безпло́тнии, претерпе́сте, воспева́ющее всеси́льному человеколю́бцу Бо́гу: Аллилу́иа.
Икос 7
Но́вое и после́днее умы́сли мучи́тель страда́ние святы́м му́чеником, да го́лени их мла́тами сокруше́ни бу́дут, е́же и претерпе́ша страда́льцы до́блественно. И та́ко сконча́вше му́ченический по́двиг, преда́ша ду́ши своя́ в ру́це Бо́жии и прия́ша от Него́ нетле́нныя венцы́. Мы же возглаша́ем в похвалу́ им си́це:
Ра́дуйтеся, прекра́снии ле́торасли са́да Иису́сова, не секи́рами, но мла́том посече́ннии;
Ра́дуйтеся, драги́е сосу́ды благода́ти Бо́жией за и́мя Христо́во сокруше́ннии.
Ра́дуйтеся, страда́льческий по́двиг сла́вно сконча́вшии;
Ра́дуйтеся, от ли́ков А́нгельских в сожи́тельство прия́тые.
Ра́дуйтеся, от проро́ков и апо́столов, я́ко тех стопа́м после́довавшии, любе́зно сре́тенные;
Ра́дуйтеся, всего́ ро́да христиа́нскаго сла́ва вели́кая.
Ра́дуйтеся, святи́и четыредеся́те му́ченицы Севасти́йстии, пресла́внии чудотво́рцы.
Кондак 8
Стра́нное чадолю́бие и неустраши́мую до́блесть показа́ чу́дная ма́терь Свята́го Мелито́на, еди́наго от ли́ка страда́льцев; ви́дящи бо телеса́ му́чеников отвози́ма на сожже́ние, своего́ же сы́на, еще́ жи́ва, кова́рно оста́вленна, взя того́ на рамена́ своя́, и той, испусти́в дух свой, Предста́ с про́чими Христу́ Бо́гу, в весе́лии поя́ Ему́: Аллилу́иа.
Икос 8
Все зверонра́вие прояви́ша мучи́тели, егда́ повеле́ша свята́я телеса́ му́чеников соже́щи огне́м и прах их в ре́ку воврещи́, да истреби́тся от челове́к па́мять их, оба́че посрами́шася; Госпо́дь же в ро́ды ве́чныя просла́ви я пред А́нгелы и челове́ки. Сего́ ра́ди та́ко вопие́м к ним:
Ра́дуйтеся, по словеси́ псалмопе́вца чрез огнь и во́ду проше́дший;
Ра́дуйтеся, страсте́м Христо́вым о́бщницы.
Ра́дуйтеся, страда́льческим по́двигом ва́шим враго́в Це́ркве Христо́вы посрами́вшии и ве́рных в ве́ре укрепи́вшии;
Ра́дуйтеся, неусы́пные моли́твенницы за род христиа́нский.
Ра́дуйтеся, ве́чно пребыва́ющии в оби́телех Отца́ Небе́снаго;
Ра́дуйтеся, предста́тельством свои́м у Го́спода благостоя́ние ми́ру испроша́ющии.
Ра́дуйтеся, святи́и четыредеся́те му́ченицы Севасти́йстии, пресла́внии чудотво́рцы.
Кондак 9
Вси христиа́не зело́ удиви́шася, ка́ко ко́сти святы́х му́ченик чуде́сно но́щию в реце́ све́тло просия́ша, и честно́ со́брани, по веле́нию святы́х, неоску́дныя ве́рным исцеле́ния подаю́т, да пое́м ди́вному во святы́х Свои́х Бо́гу: Аллилу́иа.
Икос 9
Ветия́ дре́вний, Ду́хом Бо́жиим озаре́нный, о кончи́не ве́рных во Псалти́ри проро́чески поя́ше: «Проидо́хом сквозе́ огнь и во́ду, и изве́л ны еси́ в поко́й». Вы же, святи́и му́ченицы, де́лом сие́ испо́лниша. Сего́ ра́ди в похвалу́ вам вопие́м:
Ра́дуйтеся, испо́лнивши Дави́дово прорече́ние;
Ра́дуйтеся, в страда́ниях ва́ших, я́ко зла́то в горни́ле, очи́стившиися.
Ра́дуйтеся, соблю́дшие до конца́ ве́ру Христо́ву;
Ра́дуйтеся, предста́тельством ва́шим к Бо́гу от бед нас спаса́ющии;
Ра́дуйтеся, в ско́рбех и ну́ждных обстоя́ниих нам помога́ющии;
Ра́дуйтеся, ко спасе́нию душ наставля́ющии.
Ра́дуйтеся, святи́и четыредеся́те му́ченицы Севасти́йстии, пресла́внии чудотво́рцы.
Кондак 10
Спасе́нию на́шему многомо́щнии споспе́шницы е́сте, святи́и страстоте́рпцы, те́мже усе́рдно к вам прибега́ем: помози́те нам ва́шим предста́тельством ко Го́споду остаю́щее вре́мя земна́го на́шего жития́ в покая́нии благоче́стно проводи́ти и во всех обстоя́ниих Промысли́телю Бо́гу благода́рно взыва́ти: Аллилу́иа.
Икос 10
Стено́ю моли́тв ва́ших огражда́йте нас, страстоте́рпцы Христо́вы, от всех зол и ко́зней вра́жиих, да охраня́еми ва́ми, ублажа́ем вас поиме́нно си́це:
Ра́дуйтеся, Кирио́не, Канди́де и До́мне, Боже́ственнаго Писа́ния наста́вницы;
Ра́дуйтеся, А́нгие и Ае́тие сла́внии, я́ко орли́, на небе́са возлете́вшии.
Ра́дуйтеся, Афана́сие, Агла́ие, Вивиа́не и Горго́ние, Христа́ Бо́га возлюби́вшии;
Ра́дуйтеся, Екди́те, Га́ие, Евнои́кие, Евти́хие, Дометиа́не и Иоа́нне, ду́ши своя́ за Христа́ положи́вшии.
Ра́дуйтеся, Иси́хие, Ира́клие, Кири́лле, Кла́вдие, Лисима́хе и Лео́нтие, небе́сная блага́ получи́вшии;
Ра́дуйтеся, Илиа́не и Или́е, проро́ку Или́и в ре́вности о сла́ве Бо́жией поревнова́вшии.
Ра́дуйтеся, святи́и четыредеся́те му́ченицы Севасти́йстии, пресла́внии чудотво́рцы.
Кондак 11
Пе́ние хвале́бное приноси́м вам, святи́и му́ченицы, я́ко любве́ ра́ди Христо́вы пло́ти своея́ не пощади́сте и кро́вию свое́ю торжество́ ве́ры возвели́чисте; те́мже и па́мять ва́ша, я́ко пресве́тлых свети́льников ве́ры, ве́чно в Це́ркви сия́ет, ве́рных смы́слы озаря́я, пою́щих Бо́гу: Аллилу́иа.
Икос 11
Све́том небе́сным осия́нных, у́мныма очи́ма зрим вас, пресла́внии страстоте́рпцы Христо́вы, Престо́лу бо Пресвяты́я Тро́ицы выну́ предстои́те и моли́твы о ми́ре со дерзнове́нием приноси́те; те́мже моле́бно и хвале́бно вам взыва́ем:
Ра́дуйтеся, страстоте́рпцы Христо́вы Нико́лае, При́ске, Смара́где, Сакердо́не, Севериа́не и Сиси́ние, зло́бы вра́жия победи́телие;
Ра́дуйтеся, Филоктимо́не и Фео́филе, любве́ Боже́ственныя дело́м соверши́телие.
Ра́дуйтеся, Худио́не, Кса́нфие и Фла́вие, во́ини Христо́вы предо́брии;
Ра́дуйтеся, Мелито́не, Феоду́ле и Вале́нте, верне́йшии раби́ Бо́га Вы́шняго.
Ра́дуйтеся, Христо́вы му́ченицы Вале́рие, Алекса́ндре и Ака́кие, всеусе́рднейшии исполни́телие веле́ний Госпо́дних;
Ра́дуйтеся, весе́ннею па́мятию ва́шею нам весну́ Христо́ва ве́чнаго блаже́нства возвеща́ющии.
Ра́дуйтеся, святи́и четыредеся́те му́ченицы Севасти́йстии, пресла́внии чудотво́рцы.
Кондак 12
Благода́тию оби́льно исполня́ется оби́тель Ксиропота́мская, иму́щи честны́я мо́щи ва́ша, пресла́внии му́ченицы и чудотво́рцы. Те́мже и нас, па́мять ва́шу све́тло соверша́ющих, благода́ти Бо́жией моли́твами ва́шими испо́лните, да пое́м чуде́с пода́телю Бо́гу: Аллилу́иа.
Икос 12
Пою́ще честна́я страда́ния ва́ша, святи́и му́ченицы, хва́лим Го́спода, вас укрепи́вшаго и венцы́ нетле́нными на небеси́ венча́вшаго, и я́ко уго́дников Бо́жиих и те́плых на́ших пред Ним засту́пников, восхваля́ем си́це:
Ра́дуйтеся, четыредеся́ть непоколеби́мых столпо́в Христо́вы Це́ркве;
Ра́дуйтеся, я́ко вся концы́ земли́ сла́вною па́мятию ва́шею озаря́ете.
Ра́дуйтеся, в ва́ших не́мощех теле́сных ве́лию кре́пость ду́ха яви́вшии;
Ра́дуйтеся, я́ко в труде́х поста́ и моли́твы нас утеша́ете и укрепля́ете.
Ра́дуйтеся, во гра́де Севасти́йстем, я́ко со́лнце мы́сленное, страда́ньми возсия́вшии;
Ра́дуйтеся, посвяще́нных и́мени ва́шему хра́мов и оби́телей святы́х неусы́пные покрови́телие.
Ра́дуйтеся, святи́и четыредеся́те му́ченицы Севасти́йстии, пресла́внии чудотво́рцы.
Кондак 13
О святи́и страстоте́рпцы Севасти́йстии, ле́сти лукаваго сла́внии победоно́сцы! Предста́тельством ва́шим у Го́спода испроси́те нам побе́ду на душевре́дныя стра́сти и го́рдость жите́йскую, да, в покая́нии пожи́вше, Небе́снаго Ца́рствия сподо́бимся, всегда́ о вас благода́рно пою́ще Бо́гу: Аллилу́иа.
Этот кондак читается трижды, затем 1-й икос «Ангели Божии…» и 1-й кондак «Избраннии страстотерпцы Христовы…»