Кано́нъ моле́бный святы́мъ
40 му́ченикомъ Севастíйскимъ
Моли́твами святы́хъ оте́цъ на́шихъ, Го́споди Іису́се Христе́, Сы́не Бо́жій, поми́луй на́съ, ами́нь.
Святы́й Бо́же, Святы́й Крѣ́пкій, Святы́й Безсме́ртный, поми́луй на́съ. [Три́жды, и покло́ны три.]
Сла́ва Отцу́ и Сы́ну и Свято́му Ду́ху, и ны́нѣ и при́сно и во вѣ́ки вѣко́въ, ами́нь.
Пресвята́я Тро́ице, поми́луй на́съ: Го́споди, очи́сти грѣхи́ на́ша; Влады́ко, прости́ беззако́нія на́ша; Святы́й, посѣти́ и исцѣли́ не́мощи на́ша, и́мене Твоего́ ра́ди.
Го́споди поми́луй. [Три́жды.]
Сла́ва Отцу́ и Сы́ну и Свято́му Ду́ху, и ны́нѣ и при́сно и во вѣ́ки вѣко́въ, ами́нь.
Отче на́шъ, Иже еси́ на небесѣ́хъ! Да святи́тся и́мя Твое́, да пріи́детъ Ца́рствіе Твое́, да бу́детъ во́ля Твоя́, я́ко на небеси́ и на земли́. Хлѣ́бъ на́шъ насу́щный да́ждь на́мъ дне́сь; и оста́ви на́мъ до́лги на́ша, я́коже и мы́ оставля́емъ должнико́мъ на́шимъ; и не введи́ на́съ во искуше́ніе, но изба́ви на́съ отъ лука́ваго.
Го́споди Іису́се Христе́, Сы́не Бо́жій, поми́луй на́съ, ами́нь.
Та́же, Го́споди поми́луй. [12.]
Сла́ва Отцу́ и Сы́ну и Свято́му Ду́ху, и ны́нѣ и при́сно и во вѣ́ки вѣко́въ, ами́нь.
Пріиди́те, поклони́мся Царе́ви на́шему Бо́гу. [Покло́нъ.]
Пріиди́те, поклони́мся и припаде́мъ Христу́, Царе́ви на́шему Бо́гу. [Покло́нъ.]
Пріиди́те, поклони́мся и припаде́мъ самому́ Христу́, Царе́ви и Бо́гу на́шему. [Покло́нъ.]
Псало́мъ 142:
Го́споди, услы́ши моли́тву мою́, внуши́ моле́ніе мое́ во и́стинѣ Твое́й, услы́ши мя́ въ пра́вдѣ Твое́й и не вни́ди въ су́дъ съ рабо́мъ Твои́мъ, я́ко не оправди́тся предъ Тобо́ю вся́къ живы́й. Яко погна́ вра́гъ ду́шу мою́, смири́лъ е́сть въ зе́млю живо́тъ мо́й, посади́лъ мя́ е́сть въ те́мныхъ, я́ко ме́ртвыя вѣ́ка. И уны́ во мнѣ́ ду́хъ мо́й, во мнѣ́ смяте́ся се́рдце мое́. Помяну́хъ дни́ дре́внія, поучи́хся во всѣ́хъ дѣ́лѣхъ Твои́хъ, въ творе́ніихъ руку́ Твое́ю поуча́хся. Воздѣ́хъ къ Тебѣ́ ру́цѣ мои́, душа́ моя́, я́ко земля́ безво́дная Тебѣ́. Ско́ро услы́ши мя́, Го́споди, исчезе́ ду́хъ мо́й, не отврати́ лица́ Твоего́ отъ мене́, и уподо́блюся низходя́щимъ въ ро́въ. Слы́шану сотвори́ мнѣ́ зау́тра ми́лость Твою́, я́ко на Тя́ упова́хъ. Скажи́ мнѣ́, Го́споди, пу́ть въ о́ньже пойду́, я́ко къ Тебѣ́ взя́хъ ду́шу мою́. Изми́ мя отъ вра́гъ мои́хъ, Го́споди, къ Тебѣ́ прибѣго́хъ. Научи́ мя твори́ти во́лю Твою́, я́ко Ты́ еси́ Бо́гъ мо́й. Ду́хъ Тво́й благíй наста́витъ мя́ на зе́млю пра́ву. Имене Твоего́ ра́ди, Го́споди, живи́ши мя́, пра́вдою Твое́ю изведе́ши отъ печа́ли ду́шу мою́. И ми́лостію Твое́ю потреби́ши враги́ моя́, и погуби́ши вся́ стужа́ющія души́ мое́й, я́ко а́зъ ра́бъ Тво́й е́смь.
Сла́ва Отцу́ и Сы́ну и Свято́му Ду́ху, и ны́нѣ и при́сно и во вѣ́ки вѣко́въ, ами́нь.
Аллилу́ія, аллилу́ія, аллилу́ія, сла́ва Тебѣ́, Бо́же. [Три́жды, и покло́ны три.]
Та́же, Го́споди поми́луй. [12.]
Сла́ва Отцу́ и Сы́ну и Свято́му Ду́ху, и ны́нѣ и при́сно и во вѣ́ки вѣко́въ, ами́нь.
Посе́мъ: Бо́гъ Госпо́дь… [По гла́су тропаря:]
Бо́гъ Госпо́дь, и яви́ся на́мъ, благослове́нъ гряды́й во и́мя Госпо́дне.
Сти́хъ: Исповѣ́дайтеся Го́сподеви, я́ко бла́гъ, я́ко въ вѣ́къ ми́лость Его́.
Бо́гъ Госпо́дь, и яви́ся на́мъ, благослове́нъ гряды́й во и́мя Госпо́дне.
Сти́хъ: Обыше́дше обыдо́ша мя́, и и́менемъ Госпо́днимъ противля́хся и́мъ.
Бо́гъ Госпо́дь, и яви́ся на́мъ, благослове́нъ гряды́й во и́мя Госпо́дне.
Сти́хъ: Не умру́, но жи́въ бу́ду, и повѣ́мъ дѣла́ Госпо́дня.
Бо́гъ Госпо́дь, и яви́ся на́мъ, благослове́нъ гряды́й во и́мя Госпо́дне.
Сти́хъ: Ка́мень, eго́же небрего́ша зи́ждущіи, се́й бы́сть во главу́ у́гла, отъ Го́спода бы́сть се́й, и е́сть ди́венъ во очесѣ́хъ на́шихъ.
Бо́гъ Госпо́дь, и яви́ся на́мъ, благослове́нъ гряды́й во и́мя Госпо́дне.
Тропа́рь, гла́съ 1
Страстоте́рпцы всечестнíи, во́ини Христо́вы четы́редесяте, тве́рдіи ору́жницы, сквозѣ́ бо о́гнь и во́ду проидо́сте и а́нгеломъ согра́ждане бы́сте, съ ни́миже моли́теся Христу́ о и́же вѣ́рою хва́лящихъ ва́съ. Сла́ва Да́вшему ва́мъ крѣ́пость, сла́ва Вѣнча́вшему ва́съ, сла́ва Подава́ющему ва́ми всѣ́мъ исцѣле́нія. [Два́жды.]
Сла́ва, и ны́нѣ, богоро́диченъ:
Гавріи́лу вѣща́вшу Тебѣ́, Дѣ́во, ра́дуйся, со гла́сомъ воплоща́шеся всѣ́хъ Влады́ка въ Тебѣ́, святѣ́мъ киво́тѣ, я́коже рече́ пра́ведный Дави́дъ, яви́лася еси́ ши́ршая небе́съ, поноси́вши Зижди́теля Твоего́: сла́ва Все́льшемуся въ Тя́; сла́ва Проше́дшему изъ Тебе́; сла́ва Свободи́вшему на́съ Рождество́мъ Твои́мъ.
Та́же, псало́мъ 50-й:
Поми́луй мя́, Бо́же, по вели́цѣй ми́лости Твое́й, и по мно́жеству щедро́тъ Твои́хъ очи́сти беззако́ніе мое́. Наипа́че омы́й мя отъ беззако́нія моего́, и отъ грѣха́ моего́ очи́сти мя. Я́ко беззако́ніе мое́ а́зъ зна́ю и грѣ́хъ мо́й предо мно́ю е́сть вы́ну. Тебѣ́ Еди́ному согрѣши́хъ, и лука́вое предъ Тобо́ю сотвори́хъ, я́ко да оправди́шися во словесѣ́хъ Твои́хъ и побѣди́ши, внегда́ суди́ти Ти́. Се́ бо въ беззако́ніихъ зача́тъ е́смь, и во грѣсѣ́хъ роди́ мя́ ма́ти моя́. Се́ бо и́стину возлюби́лъ еси́, безвѣ́стная и та́йная прему́дрости Твоея́ яви́лъ ми́ еси́. Окропи́ши мя́ иссо́помъ, и очи́щуся, омы́еши мя́, и па́че снѣ́га убѣлю́ся. Слу́ху моему́ да́си ра́дость и весе́ліе, возра́дуются ко́сти смире́нныя. Отврати́ лице́ Твое́ отъ грѣ́хъ мои́хъ, и вся́ беззако́нія моя́ очи́сти. Се́рдце чи́сто сози́жди во мнѣ́, Бо́же, и ду́хъ пра́въ обнови́ во утро́бѣ мое́й. Не отве́ржи мене́ отъ лица́ Твоего́, и Ду́ха Твоего́ Свята́го не отъими́ отъ мене́. Возда́ждь ми́ ра́дость спасе́нія Твоего́, и Ду́хомъ Влады́чнимъ утверди́ мя́. Научу́ беззако́нныя путе́мъ Твои́мъ, и нечести́віи къ Тебѣ́ обратя́тся. Изба́ви мя́ отъ крове́й, Бо́же, Бо́же спасе́нія моего́, возра́дуется язы́къ мо́й пра́вдѣ Твое́й. Го́споди, устнѣ́ мои́ отве́рзеши, и уста́ моя́ возвѣстя́тъ хвалу́ Твою́. Я́ко а́ще бы восхотѣ́лъ еси́ же́ртвы, да́лъ бы́хъ убо́, всесожже́нія не благоволи́ши. Же́ртва Бо́гу ду́хъ сокруше́нъ, се́рдце сокруше́нно и смире́нно Бо́гъ не уничижи́тъ. Ублажи́, Го́споди, благоволе́ніемъ Твои́мъ Сіо́на, и да сози́ждутся стѣ́ны Іерусали́мскія. Тогда́ благоволи́ши же́ртву пра́вды, возноше́ніе и всесожега́емая: тогда́ возложа́тъ на олта́рь Тво́й тельцы́.
Кано́нъ му́чениковъ, гла́съ 2.
Пѣ́снь 1.
Ирмо́съ: Гряди́те лю́діе, пои́мъ пѣ́снь Христу́ Бо́гу, раздѣ́льшему мо́ре и наста́вльшему лю́ди, я́же изведе́ изъ рабо́ты еги́петскія, я́ко просла́вися.
Припѣ́въ: Святíи му́ченицы четы́редесяте, моли́те Бо́га о на́съ.
Бо́га на́мъ, му́ченицы четы́редесяте, ны́нѣ благопремѣ́нна сотвори́те моли́твами ва́шими, чи́стою се́рдца любо́вію призыва́ющимъ ва́съ.
Припѣ́въ: Святíи му́ченицы четы́редесяте, моли́те Бо́га о на́съ.
На небесѣ́хъ трисо́лнечнаго сія́нія заря́ми просвѣща́еми, четы́редесяте, на земли́ изме́рзшія зимо́ю напа́стей, покры́йте ны́, пою́щія вы́.
Сла́ва: Неразори́ма благоче́стія и непоколеби́мая Це́ркве забра́ла, четы́редесяте, христоимени́тое зва́ніе лю́те смуща́емаго ны́нѣ умири́те.
И ны́нѣ: Преесте́ственно надъ всѣ́ми су́щаго родила́ еси́ Зижди́теля и Го́спода, пло́ть бы́вша на́съ ра́ди, человѣ́къ, Дѣ́во Богоро́дице Ма́ти Неискусому́жная.
Катава́сія: Моли́те Бо́га о на́съ, святíи му́ченицы четы́редесяте, я́ко мы́ усе́рдно къ ва́мъ прибѣга́емъ, ско́рымъ помо́щникомъ и моли́твенникомъ о душа́хъ на́шихъ. [Покло́нъ.]
Го́споди поми́луй. [Три́жды.]
Пѣ́снь 3.
Ирмо́съ: Утверди́ на́съ въ Тебѣ́, Го́споди, дре́вомъ умерщвле́й грѣ́хъ, и стра́хъ Тво́й всади́ въ сердца́ на́съ, пою́щихъ Тя́.
Припѣ́въ: Святíи му́ченицы четы́редесяте, моли́те Бо́га о на́съ.
Во́инство му́ченическое и спряже́нный ли́че му́ченикъ вѣнцено́сецъ, Влады́цѣ предстоя́ще, восхваля́ющія вы́ при́сно спаса́йте.
Припѣ́въ: Святíи му́ченицы четы́редесяте, моли́те Бо́га о на́съ.
Езеромъ страсте́й обурева́еміи и волно́ю напа́стей лю́тыхъ, къ ва́мъ, четы́редесятемъ Христо́вымъ во́иномъ, прибѣга́емъ.
Сла́ва: Въ нѣ́дрѣхъ Авраа́мовыхъ согрѣва́еміи и сла́вною оде́ждею украша́еміи, зимо́ю обстоя́нія свя́занныхъ разрѣши́ти помоли́теся.
И ны́нѣ: Утвержде́ніе бу́ди, и прибѣ́жище, и покро́въ, Дѣ́во Богоневѣ́сто, вѣ́рою къ Тебѣ́ прибѣга́ющимъ и Бо́жію Тя́ Ма́терь исповѣ́дающимъ.
Катава́сія: Моли́те Бо́га о на́съ, святíи му́ченицы четы́редесяте, я́ко мы́ усе́рдно къ ва́мъ прибѣга́емъ, ско́рымъ помо́щникомъ и моли́твенникомъ о душа́хъ на́шихъ. [Покло́нъ.]
Го́споди поми́луй. [Три́жды.]
Сѣда́ленъ, гла́съ 8:
Христу́ вво́инившеся му́ченически, врага́ низложи́вше страда́льчески, дѣ́лы испо́лнисте проро́ка глаго́лы: сквозѣ́ бо о́гнь и во́ду му́жески проидо́сте, поко́й обрѣ́тше, жи́знь нетлѣ́нную. Тѣ́мже небе́сными укра́шшеся вѣнцы́, съ ли́ки веселите́ся безпло́тныхъ, блаже́нніи страстоте́рпцы прехва́льніи, моли́те Христа́ Бо́га грѣхо́въ оставле́ніе дарова́ти чту́щимъ любо́вію святу́ю па́мять ва́шу.
Сла́ва, и ны́нѣ, богоро́диченъ:
Въ напа́сти многоплете́нныя впа́дъ отъ вра́гъ ви́димыхъ и неви́димыхъ, бу́рею одержи́мь безчи́сленныхъ согрѣше́ній мои́хъ, и я́ко къ те́плому заступле́нію и покро́ву моему́, Чи́стая, ко приста́нищу притека́ю Твоея́ бла́гости. Тѣ́мже, Пречи́стая, изъ Тебе́ Воплоще́нному безсѣ́менно моли́ся прилѣ́жно о всѣ́хъ рабѣ́хъ Твои́хъ, непреста́нно моля́щихъ Ти ся, Богоро́дице Пречи́стая, моля́щи Его́ при́сно согрѣше́ній оставле́ніе дарова́ти воспѣва́ющимъ досто́йно сла́ву Твою́.
Пѣ́снь 4.
Ирмо́съ: Услы́шахъ, Го́споди, слу́хъ Твоего́ смотре́нія, и просла́вихъ Тя́, Еди́не Человѣколю́бче.
Припѣ́въ: Святíи му́ченицы четы́редесяте, моли́те Бо́га о на́съ.
Просвѣще́ніе на́мъ, му́ченицы, отъ Бо́га бы́сте, въ сія́ніе бо облеко́стеся неприсѣ́нное.
Припѣ́въ: Святíи му́ченицы четы́редесяте, моли́те Бо́га о на́съ.
Богоизбра́нный, моли́ся, собо́ре му́ченикъ вѣнцено́сный, изба́вити бѣ́дъ воспѣва́ющія тя́.
Припѣ́въ: Святíи му́ченицы четы́редесяте, моли́те Бо́га о на́съ.
Свѣ́тъ непристу́пный, святíи, Христо́въ ви́дѣти сподо́бльшеся, су́щія во тмѣ́ сія́ти удосто́йте.
Сла́ва: Облиста́юще, сла́вніи, мы́сленнымъ Христа́ свѣтонаставле́ніемъ, къ зари́ Боже́ственнѣй руково́дствуйте.
И ны́нѣ: Пѣсносло́вяще, Чи́стая, изъ утро́бы Твоея́ вопло́щшагося, Тя́ славосло́вимъ, я́ко Бо́жію Ма́терь.
Катава́сія: Моли́те Бо́га о на́съ, святíи му́ченицы четы́редесяте, я́ко мы́ усе́рдно къ ва́мъ прибѣга́емъ, ско́рымъ помо́щникомъ и моли́твенникомъ о душа́хъ на́шихъ. [Покло́нъ.]
Го́споди поми́луй. [Три́жды.]
Пѣ́снь 5.
Ирмо́съ: Свѣ́та Пода́телю, и вѣко́въ Тво́рче, Го́споди, во свѣ́тѣ Твои́хъ повелѣ́ній наста́ви на́съ: ра́звѣ бо Тебе́, ино́го Бо́га не зна́емъ.
Припѣ́въ: Святíи му́ченицы четы́редесяте, моли́те Бо́га о на́съ.
Неи́стовства ерети́ческаго, четы́редесяте, и ны́нѣ изба́вите Христо́ву честну́ю Це́рковь, въ не́йже ро́ждшеся, въ толи́ко досто́инство и сла́ву премину́сте.
Припѣ́въ: Святíи му́ченицы четы́редесяте, моли́те Бо́га о на́съ.
Явльшеся на́мъ, четы́редесяте Христо́вы му́ченицы богоза́рніи, огневи́дніи свѣти́льницы, просвѣща́ютъ вѣ́рнымъ благоче́стія пу́ть спаси́тельный.
Сла́ва: Отъ земли́ преста́вистеся къ небе́снѣй сѣ́ни, му́ченицы, идѣ́же Христу́ Подвигополо́жнику предстоя́ще, Боже́ственныя мя́ ра́дости улучи́ти сподо́бите.
И ны́нѣ: Яко непостижи́мое и неудобозри́мое вся́кому, Влады́чице, е́же па́че ума́ та́инство, Отрокови́це, Боже́ственнаго Твоего́ рождества́: су́щаго бо вои́стинну Бо́га на́мъ родила́ еси́.
Катава́сія: Моли́те Бо́га о на́съ, святíи му́ченицы четы́редесяте, я́ко мы́ усе́рдно къ ва́мъ прибѣга́емъ, ско́рымъ помо́щникомъ и моли́твенникомъ о душа́хъ на́шихъ. [Покло́нъ.]
Го́споди поми́луй. [Три́жды.]
Пѣ́снь 6.
Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же мя́ возведи́.
Припѣ́въ: Святíи му́ченицы четы́редесяте, моли́те Бо́га о на́съ.
Бо́дрствующіи и тре́звенніи храни́теліе ро́да человѣ́ческаго яви́стеся, держа́вніи, и моли́твенницы моле́ній, помо́щницы же печа́льныхъ поста́вистеся.
Припѣ́въ: Святíи му́ченицы четы́редесяте, моли́те Бо́га о на́съ.
Непристу́пными сія́юще добро́тами въ Це́ркви Христо́вѣ, всехва́льніи, искуше́ній изба́вите съ любо́вію ва́съ почита́ющихъ.
Сла́ва: Бѣся́щихся мучи́телей всеизря́дніи дре́вле потреби́теліе пре́лести бы́сте, и на́мъ ны́нѣ по́мощь ско́рая и стѣна́ бу́дите.
И ны́нѣ: На Тя́ упова́ніе возложи́хъ, Ма́ти Приснодѣ́во, спасе́нія моего́ и Тя́ Предста́тельницу положи́хъ жи́зни, тве́рду же и непоколеби́му.
Катава́сія: Моли́те Бо́га о на́съ, святíи му́ченицы четы́редесяте, я́ко мы́ усе́рдно къ ва́мъ прибѣга́емъ, ско́рымъ помо́щникомъ и моли́твенникомъ о душа́хъ на́шихъ. [Покло́нъ.]
Го́споди поми́луй. [Три́жды.] Сла́ва и ны́нѣ.
Конда́къ, гла́съ 6. Подо́бенъ: Еже о на́съ.
Все́ во́инство мíра оста́вльше, на небесѣ́хъ Влады́цѣ прилѣпи́стеся, страстоте́рпцы Госпо́дни четы́редесять, сквозѣ́ о́гнь бо и во́ду проше́дше, блаже́нніи, досто́йно воспрія́сте сла́ву съ небе́съ и вѣнце́въ мно́жество.
Икосъ:
На престо́лѣ непристу́пнѣмъ сѣдя́щему, просте́ршему не́бо, я́ко ко́жу, и зе́млю утверди́вшему, и собра́вшему во́ды въ со́нмы и́хъ, вся́ отъ не су́щихъ сотво́ршему бы́ти и всѣ́мъ подаю́щу дыха́ніе и живо́тъ, пріе́млющему отъ арха́нгелъ пѣ́ніе, и отъ а́нгелъ покланя́емому, и отъ всѣ́хъ сла́вимому, Христу́ Вседержи́телю, Зижди́телю и Бо́гу на́шему, припа́даю, недосто́йный, принося́ мое́ моле́ніе, сло́ва благода́ти прошу́: да возмогу́ благоче́стно воспѣ́ти и а́зъ святы́я, я́же Са́мъ показа́въ побѣди́тели, дарова́въ и́мъ сла́ву съ небе́съ и вѣнце́въ мно́жество.
Пѣ́снь 7.
Ирмо́съ: Образу злато́му, на по́лѣ Деи́рѣ служи́му, тріе́ Твои́ о́троцы небрего́ша безбо́жнаго велѣ́нія, посредѣ́ же огня́ вве́ржени, ороша́еми, поя́ху: благослове́нъ еси́, Бо́же оте́цъ на́шихъ.
Припѣ́въ: Святíи му́ченицы четы́редесяте, моли́те Бо́га о на́съ.
Наста́ свѣ́тло лѣ́тняя ва́ша па́мять, всебога́тіи, просвѣща́ющи дале́че сія́ющая поста́ свѣ́тлостію. Сію́ пра́зднующе вѣ́рою, съ ва́ми воспѣва́емъ: благослове́нъ еси́, Бо́же оте́цъ на́шихъ.
Припѣ́въ: Святíи му́ченицы четы́редесяте, моли́те Бо́га о на́съ.
Рѣши́теліе страсте́й и свѣти́льницы, издале́ча сія́ющіи, мíра очище́ніе, пре́лести разруше́ніе, велегла́сніи и́стины проповѣ́дницы, лжи́ прогони́теліе всѣ́мъ яви́стеся, пою́ще: благослове́нъ еси́, Бо́же оте́цъ на́шихъ.
Припѣ́въ: Святíи му́ченицы четы́редесяте, моли́те Бо́га о на́съ.
Свѣти́ла мы́сленная, сія́юще на́мъ, яви́стеся, му́ченицы, обурева́емыя спаса́ете и наставля́ете пла́вающія, житія́ волну́ющіяся бу́рею, Христу́ воспѣва́юще: благослове́нъ еси́, Бо́же оте́цъ на́шихъ.
Сла́ва: Красно́ Бо́гу и а́нгеломъ возжелѣ́нно, четы́редесяте богособра́нное, и богодухнове́нное, и пресвѣ́тлое ополче́ніе, боже́ственное и стра́шное всеору́жіе вопію́ще и глаго́люще: благослове́нъ еси́, Бо́же оте́цъ на́шихъ.
И ны́нѣ: Свѣти́льникъ Свѣ́та, и о́блакъ свѣ́телъ, и свяще́нія мѣ́сто показа́ся, Неискусобра́чная, и́бо святы́хъ Свята́го Сло́ва прія́тъ несказа́нно. Его́же пою́ще, взыва́емъ: благослове́нъ еси́, Бо́же оте́цъ на́шихъ.
Катава́сія: Моли́те Бо́га о на́съ, святíи му́ченицы четы́редесяте, я́ко мы́ усе́рдно къ ва́мъ прибѣга́емъ, ско́рымъ помо́щникомъ и моли́твенникомъ о душа́хъ на́шихъ. [Покло́нъ.]
Го́споди поми́луй. [Три́жды.]
Пѣ́снь 8.
Ирмо́съ: Въ пе́щь о́гненную ко отроко́мъ евре́йскимъ снизше́дшаго, и пла́мень въ ро́су прело́жшаго Бо́га, по́йте дѣла́, я́ко Го́спода, и превозноси́те во вся́ вѣ́ки.
Припѣ́въ: Святíи му́ченицы четы́редесяте, моли́те Бо́га о на́съ.
Претво́ршеся къ жи́зни и́стиннѣй, е́же о Христѣ́ ны́нѣ сокрове́ннѣй, къ зи́мнѣй и болѣ́зненнѣй кончи́нѣ, до́бліи, крѣ́пко вда́стеся, спасе́нія и оставле́нія прося́ще на́мъ.
Припѣ́въ: Святíи му́ченицы четы́редесяте, моли́те Бо́га о на́съ.
Отъ земли́ къ небе́снымъ преше́дше, страда́льцы вѣнцено́сцы, Це́ркви му́ченикъ побѣдоно́сныхъ ли́че, бѣ́дъ, страсте́й, обстоя́ній избавле́нія проси́те на́мъ и спасе́нія.
Припѣ́въ: Святíи му́ченицы четы́редесяте, моли́те Бо́га о на́съ.
Расто́ргъ сме́рти у́зы Спа́съ, страда́льцемъ побѣ́ды подаде́ на сме́рть: четы́редесять бо, мра́зомъ согрѣва́еми, поя́ху и спасе́нія всѣ́мъ вѣ́рнымъ прося́ще.
Сла́ва: Напа́стей прило́ги, нападе́ніе страсте́й, де́моновъ искуше́нія боже́ственный страстоно́сецъ ли́къ моли́твою изыма́етъ я́вѣ отъ пою́щихъ Христа́ во вѣ́ки.
И ны́нѣ: Умерщвле́нныя и къ пе́рсти сме́ртнѣй и тлѣ́нію сведе́нныя воскреси́ла еси́, еди́на, Нача́льника жи́зни ро́ждши, Христа́ Бо́га на́шего, Влады́чице Дѣ́во, Чи́стая Богороди́тельнице.
Катава́сія: Моли́те Бо́га о на́съ, святíи му́ченицы четы́редесяте, я́ко мы́ усе́рдно къ ва́мъ прибѣга́емъ, ско́рымъ помо́щникомъ и моли́твенникомъ о душа́хъ на́шихъ. [Покло́нъ.]
Го́споди поми́луй. [Три́жды.]
Пѣ́снь 9.
Ирмо́съ: Отъ Бо́га Бо́га Сло́ва, неизрече́нною му́дростію прише́дшаго обнови́ти Ада́ма, я́дію въ тлѣ́ніе па́дшаго лю́тѣ, отъ Святы́я Дѣ́вы неизрече́нно воплоти́вшагося на́съ ра́ди, вѣ́рніи, единому́дренно пѣ́сньми велича́емъ.
Припѣ́въ: Святíи му́ченицы четы́редесяте, моли́те Бо́га о на́съ.
Преесте́ственныя зари́, и ра́дости несказа́нныя, и сла́вы сподо́бистеся улучи́ти, ны́нѣ же любо́вію чту́щія ва́съ напа́стей, и бѣ́дъ, и лука́вствія изба́вите вра́жія, Христо́вы во́ини, му́ченицы четы́редесяте.
Припѣ́въ: Святíи му́ченицы четы́редесяте, моли́те Бо́га о на́съ.
Си́лу, пребога́тіи, Боже́ственную съ небесе́ пріе́мше и крѣ́пость, соу́зницы Христо́вы, льсти́ прогони́теліе бы́сте, отгоня́ще вся́ку и́дольскую мглу́ непостоя́нную и просвѣща́юще мíръ, му́ченицы четы́редесяте.
Припѣ́въ: Святíи му́ченицы четы́редесяте, моли́те Бо́га о на́съ.
Укра́шшеся добро́тою честна́го муче́нія и Боже́ственнаго прича́стницы бы́вше естества́, вои́стинну ра́дуетеся, Свѣ́ту сраствори́вшеся свѣтлѣ́йшему и чи́стому, Христо́вы во́ини, му́ченицы четы́редесяте.
Сла́ва: Ны́нѣ Христу́ предстоя́ще благочести́вымъ дерзнове́ніемъ и отону́ду Божества́ свѣ́томъ облиста́еми, сла́вніи, восхваля́ющія вы́ заре́ю освѣти́тися трисія́нною, прилѣ́жно моли́те, му́ченицы четы́редесяте.
И ны́нѣ: Явльшійся, Дѣ́во, души́ моея́ примра́къ свѣ́та Твоего́ невеще́ственными блиста́ньми озари́, две́ре Боже́ственнаго Свѣ́та, и огня́ вѣ́чнаго изба́витися сподо́би, Чи́стая, вѣ́рою и любо́вію пѣ́сньми Тя́ велича́ющаго.
Катава́сія: Моли́те Бо́га о на́съ, святíи му́ченицы четы́редесяте, я́ко мы́ усе́рдно къ ва́мъ прибѣга́емъ, ско́рымъ помо́щникомъ и моли́твенникомъ о душа́хъ на́шихъ. [Покло́нъ.]
Го́споди поми́луй. [Три́жды.]
Посе́мъ задосто́йникъ, гласъ 8:
Влады́чице, пріими́ моли́тву ра́бъ Свои́хъ и изба́ви на́съ отъ вся́кія ну́жды и печа́ли. Ты́ еси́, Богоро́дице, ору́жіе на́ше и стѣна́. Ты́ еси́ Засту́пнице, и къ Тебѣ́ прибѣга́емъ, Тя́ и ны́нѣ на моли́тву призыва́емъ, да изба́виши ны́ отъ вра́гъ на́шихъ. Возвели́чимъ Тя́ вси́, Пренепоро́чную Ма́терь Христа́ Бо́га на́шего, Юже осѣни́ Ду́хъ Пресвяты́й. [Покло́нъ до земли́.]
Та́же:
Святы́й Бо́же, Святы́й Крѣ́пкій, Святы́й Безсме́ртный, поми́луй на́съ. [Три́жды, и покло́ны три.]
Сла́ва Отцу́ и Сы́ну и Свято́му Ду́ху, и ны́нѣ и при́сно и во вѣ́ки вѣко́въ, ами́нь.
Пресвята́я Тро́ице, поми́луй на́съ: Го́споди, очи́сти грѣхи́ на́ша; Влады́ко, прости́ беззако́нія на́ша; Святы́й, посѣти́ и исцѣли́ не́мощи на́ша, и́мене Твоего́ ра́ди.
Го́споди поми́луй. [Три́жды.]
Сла́ва Отцу́ и Сы́ну и Свято́му Ду́ху, и ны́нѣ и при́сно и во вѣ́ки вѣко́въ, ами́нь.
Отче на́шъ, Иже еси́ на небесѣ́хъ! Да святи́тся и́мя Твое́, да пріи́детъ Ца́рствіе Твое́, да бу́детъ во́ля Твоя́, я́ко на небеси́ и на земли́. Хлѣ́бъ на́шъ насу́щный да́ждь на́мъ дне́сь; и оста́ви на́мъ до́лги на́ша, я́коже и мы́ оставля́емъ должнико́мъ на́шимъ; и не введи́ на́съ во искуше́ніе, но изба́ви на́съ отъ лука́ваго.
Го́споди Іису́се Христе́, Сы́не Бо́жій, поми́луй на́съ, ами́нь.
Тропа́рь, гла́съ 1:
Страстоте́рпцы всечестнíи, во́ини Христо́вы четы́редесяте, тве́рдіи ору́жницы, сквозѣ́ бо о́гнь и во́ду проидо́сте и а́нгеломъ согра́ждане бы́сте, съ ни́миже моли́теся Христу́ о и́же вѣ́рою хва́лящихъ ва́съ. Сла́ва Да́вшему ва́мъ крѣ́пость, сла́ва Вѣнча́вшему ва́съ, сла́ва Подава́ющему ва́ми всѣ́мъ исцѣле́нія.
Сла́ва, конда́къ, гла́съ 6:
Все́ во́инство мíра оста́вльше, на небесѣ́хъ Влады́цѣ прилѣпи́стеся, страстоте́рпцы Госпо́дни четы́редесять, сквозѣ́ о́гнь бо и во́ду проше́дше, блаже́нніи, досто́йно воспрія́сте сла́ву съ небе́съ и вѣнце́въ мно́жество.
И ны́нѣ, богоро́диченъ, гла́съ 1:
Гавріи́лу вѣща́вшу Тебѣ́, Дѣ́во, ра́дуйся, со гла́сомъ воплоща́шеся всѣ́хъ Влады́ка въ Тебѣ́, святѣ́мъ киво́тѣ, я́коже рече́ пра́ведный Дави́дъ, яви́лася еси́ ши́ршая небе́съ, поноси́вши Зижди́теля Твоего́: сла́ва Все́льшемуся въ Тя́; сла́ва Проше́дшему изъ Тебе́; сла́ва Свободи́вшему на́съ Рождество́мъ Твои́мъ.
Го́споди поми́луй. [40.]
Сла́ва Отцу́ и Сы́ну и Свято́му Ду́ху, и ны́нѣ и при́сно и во вѣ́ки вѣко́въ, ами́нь.
Таже:
Честнѣ́йшую херуви́мъ и сла́внѣйшую безъ сравне́нія серафи́мъ, безъ истлѣ́нія Бо́га Сло́ва ро́ждшую, су́щую Богоро́дицу, Тя́ велича́емъ. [Покло́нъ до земли́.]
Сла́ва Отцу́ и Сы́ну и Свято́му Ду́ху, и ны́нѣ и при́сно и во вѣ́ки вѣко́въ, ами́нь.
Го́споди поми́луй. [Три́жды.]
И отпу́стъ: Го́споди Іису́се Христе́, Сы́не Бо́жій, моли́твъ ра́ди Пречи́стыя Твоея́ Ма́тере, и святы́хъ четы́редесятихъ му́ченикъ, и всѣ́хъ святы́хъ, поми́луй и спаси́ на́съ, я́ко Бла́гъ и Человѣколю́бецъ, ами́нь.